வழி விடுங்கள்…!

Standard

— சுடரொளி

‘எத்தனை மணிக்கு வேண்டுமானாலும் வெளியில் செல்லலாம்?!’ என்பதே ‘பெண்கள் மேம்பாடு’ (Women Empowerment) என்று பல பெண்கள் நினைக்கிறார்கள். அதுவல்ல, Women Empowerment என்பது நன்றாக படித்து, நல்ல பணியில் சேர்ந்து முன்னேறுவது தான்.”

“பார்த்தீங்களா, இப்போ பொண்ணுங்க எல்லாம் எப்படி dress பண்ணிக்கிறாங்கன்னு. பசங்க என்னங்க பண்ணுவாங்க, இதை பார்த்து, அவங்க ஹோர்மோன்ஸ் சுரந்ததுன்னா?! அவங்களை நாம எப்படி தப்பு சொல்ல முடியும்!”

“கல்யாணம் பண்ணிக்காம, ஒரு பெண்ணால எப்படி ஒழுக்கமா வாழ முடியும்? என்னோட பொண்ணுங்க எல்லாம் நல்ல படிச்சிருக்காங்க, நல்ல வேலையில இருக்காங்க. கல்யாணம் பண்ணி, குடும்பமா செட்டில் ஆகியிருக்காங்க.”

“என்ன மாப்பிள்ளைக்கு பைக் ஓட்ட தெரியாதா? ஸ்கூட்டர் தான் ஓட்டுவாரா? அது பொம்பளைங்க ஓட்டுறது ஆச்சே!”

“ஏம்மா இந்த கூட்டத்துல வந்து நின்னுக்கிட்டு இருக்க, பெண்களுக்குன்னு தனி coach தான் இருக்கே trainல?”

“பொம்பளைங்க தண்ணி அடிக்கிறதா? அதெல்லாம் எதுக்கு பண்ணனும்? பாரு, ஸ்ரீதேவி சாகும் போது fullஆ அடிசிருந்துச்சாம்!”

இன்னும் இன்னும், பல்வேறு விதமாய், பல்வேறு கருத்துக்கள், ஒவ்வொரு நாளும், ஒவ்வொரு விதமாய், பெண்களை சுற்றியே சுழல்கிறது! சில சமயங்களில் பெண்களிடமிருந்தே, சில சமயங்களில் இதை போன்ற கருத்துக்களை கேட்கும் போது, அதன் வேதனையை என்னவென்று சொல்லுவது! படித்திருந்தும், விரிவாய் எதை பற்றியும் யோசிக்க இயலாத, அவர்களின் அறிவின்மையை என்னவென்பது! எங்கு திரும்பினாலும், ஏதாவதொரு கேள்வி, அவளின் எதையாவது பற்றி.

நில்லுங்கள்! உங்கள் கவனத்தை எங்கள் மீதே வைக்காதீர்கள். உங்களின் புதிது புதிதான கேள்விகளுக்கு தினம் தினம் பதில் கூறி, எங்கள் ஆற்றலை நாங்கள்  வீணடிக்க விரும்பவில்லை.  கொஞ்சம் வழி விடுங்கள், எங்கள் வாழ்க்கையை நாங்கள் வாழ வேண்டும்!

செய்தி வெளியீடு: பாலின சமத்துவம் தேர்தல் சரிபார்ப்பு பட்டியல்

Standard

செய்தி வெளியீடு

பாலின சமத்துவத்திற்காக வாக்களியுங்கள்கட்சிகள் மற்றும் வாக்காளர்களுக்கான தேர்தல் சரிபார்ப்பு பட்டியல் வெளியீடு :

சென்னை:

அடுத்த இரண்டு வாரங்களில், மே 16, 2016 அன்று நடைபெறவுள்ள மாநில சட்டமன்ற தேர்தலில் போட்டியிடவிருக்கும் ஒவ்வொரு அரசியல் கட்சியின் வேட்பாளர்கள் யார் என்று தமிழ்நாட்டு மக்கள் அறிவார்கள்.

வெளியேறிய சட்டமன்றத்தில், பெண் உறுப்பினர்களின் பங்கு அதிகபட்சம் வெறும் ஏழு (7%) சதவிகிதமாக இருந்திருக்கிறது. வரவிருக்கும் தேர்தலில், அனைத்திந்திய அண்ணா திராவிட முன்னேற்றக் கழகம் வெளியிட்ட முதல் வேட்பாளர் பட்டியலில் 227 வேட்பாளர்கள் உள்ளனர். இவர்களில் 31 மட்டுமே பெண்கள் – பதினான்கு சதவிகிதம் (14%) மட்டுமே. வெளிவரவிருக்கும் மற்ற கட்சிகளின் பட்டியல்கள் பாலினச் சமநிலையில் இதைவிட சிறப்பாக இருக்கும் என்பதை நம்புவதற்கு எந்தக் காரணமும் இல்லை.

பாலின சமத்துவம் என்பது ஒரு சமூக நிலை, ஒரு அரசியல் நிலை. இந்த சமத்துவம் இல்லாத ஜனநாயகம் முழுமையற்ற, நிறைவற்ற ஒன்றாகும். ஆனால் பாலினம் சம்பந்தமான பிரச்சினைகள் இந்திய தேர்தலின் சொல்லாட்சியில் அரிதாகவே இடம்பெறுகின்றன. அப்படி இடம்பெரும்போழுது, நம் பேச்சும் விவாதங்களும் பாதுகாப்பு குறித்த அம்சங்களை பற்றி மட்டும் இருக்கின்றன. இந்தியாவின் பழமைவாய்ந்த முற்போக்கான மற்றும் பகுத்தறிவு இயக்கங்களில் ஒன்றாக தமிழ்நாடு மாநில அரசியல் திகழ்கின்றது. தர்க்கரீதியாக, ஆண்-பெண் சமத்துவம் இந்த மரபின் ஒரு முக்கிய பகுதியாக இருக்க வேண்டும்.

தேர்தல் வேட்பாளர்களை தேர்ந்தெடுப்பதில் பாலின சமத்துவத்துவத்தை ஒரு வழிகாட்டும் கொள்கையாக ஏற்க வேண்டும் என்று பிரக்ஞா தமிழ்நாட்டிலுள்ள அரசியல் கட்சிகளிடம் வலியுறுத்துகின்றது. இதை நோக்கி, ‘பிரக்ஞா பாலின சமத்துவம் தேர்தல் சரிபார்ப்பு பட்டியல்’, என்ற பட்டியலை அரசியல் கட்சிகளுக்காகவும் வாக்காளர்களுக்காகவும் வெளியிடுகிறோம். இந்த சரிபார்ப்பு பட்டியல், கட்சிகள் தங்கள் வேட்பாளர்களை தேர்ந்தெடுக்கும்பொழுது எளிதாக பயன்படுத்தகூடிய ஒரு வழிகாட்டியாகவும், வாக்காளர்கள் தங்கள் பிரதிநிதியை தேர்ந்தெடுக்க செயல்படும் ஒரு வழிகாட்டியாகவும் இருக்கும் என்று நம்புகிறோம்.

மீண்டும் வலியுறுத்துகின்றோம்: பாலின சமத்துவம் இல்லாத ஜனநாயகம் வெறும் பொருளற்ற நிழல் ஆகும். இந்த தேர்தலில், உண்மையான ஜனநாயகத்தை வலியுறுத்துங்கள். பாலின சமத்துவத்திற்காக வாக்களியுங்கள்.

மேலும் விவரங்களுக்கு, தொடர்பு கொள்ளவும்:

பிரக்ஞா அறக்கட்டளை

http://www.prajnya.in, media.prajnya@gmail.com